Suliniut pillugu paasissutissat

Suliniut pillugu paasissutissat

Nittartagaq manna suliniutip ’Kalaallit isumaginninnikkut atugarliortut eqqarsaatigalugit ilisimasanik ingerlatitseqqittarneq suliniarnermillu ineriartortitsinerup’ ilagaa. Suliniut Styrelsen for Social Servicemit (isumaginninnikkut kiffartuussinermut aqutsisoqarfik) pilersinneqarsimavoq ullumikkullu isumaginninnermut ministereqarfimmit (Socialministeriet) aningaasatigut tapiiffigineqartarluni. Suliniut Socialt Udviklingscenter SUS-imit isumagisarineqarpoq.

2003-mi isumaginninnermut ministereqarfik naliliivoq, kalaallinit Danmarkimi najugaqartunit 7.000-it missaanniittunit 700-t aamma 800-t akornanni amerlassuseqartut isumaginninnikkut atugarliortuusut (kisitsisit ”Hvidbog om social udsatte grønlændere i Danmark”-imit (kalaallit Danmarkimi isumaginninnikkut atugarliortut pillugit nalunaarusiaq), Socialministeriet, 2003, pisuupput).

Kalaallit atugarliortut ilaatigut atornerluinermik, angerlarsimaffeqannginnermik, suliffissaaleqinermik eqqarsartaatsikkullu erloqissuteqarnermik ajornartorsiuteqarnermik ilisarnaateqarput. Kalaallit atugarliortut amerlanertigut oqaatsitigut, ilinniagaqarsimassutsikkut inooqatigiinnikkullu tunngavissanik, Danmarkimi inuiaqatigiinni nammineersinnaassagaanni pisariaqartunik, amigaateqartarput.

Kalaallit isumaginninnikkut atugarliortut pingaartumik illoqarfinni anginerni, Københavnimi, Odensemi, Esbjergimi, Århusimi Aalborgimilu inissisimaffeqartarput. Taamaattumik pingaartumik illoqarfinni taakkunani nuna tamakkerlugu suliniarneq ingerlanneqarpoq. Quppernermi matumani Københavnimi, Odensemi, Esbjergimi, Århusimi Aalborgimilu kalaallinut neqeroorutigineqartut allaaserineqarneri atuarsinnaavatit.

Suliniutip siunertaa

Suliniut siunertaqarpoq kalaallit isumaginninnikkut atugarliortut pillugit suliniarnermut tunngasunik ilisimasanik suliassaqarfimmi ingerlatsisunut ingerlatitseqqittarnissamik kiisalu ingerlatsisut ataatsimuulersinnissaannik taakkulu misilittakkanik paarlaasseqatigiittarnerannik ikorfartuinissamik taamaaliornikkullu suliniarneq ineriartorteqqikkumallugu.

Nittartagaq ingerlatallu allat aqqutigalugit aamma kommunini sulisut, nammineq kajumissutsimik suliniaqatigiiffinni suliniaqatigiiffinnilu namminersortuni sulisut allallu ilisimasanik, kalaallit atugarliortut eqqarsaatigalugit suliniarnermut pitsanngorsaataasussanik anngussiviginissaat taamaaliornikkullu suliniarnerup nukittorsarneqarnissaa siunertarineqarpoq.

Suliniummi ingerlatat tigussaasut makkuupput:

   1. Nittartakkamik www.udsattegroenlaendere.dk-mik ingerlatsineq

   2. Attaveqatigiiffimmi ataatsimiititsinernik ingerlatsisarneq

   3. Saqqummersitat ingerlaartitat

Nittartagaq

Suliniummi pingaarutilimmik inissisimaffeqartoq tassaavoq nittartagaq manna. Nittartakkamit sulianit misilittaakkat kiisalu kalaallit isumaginninnikkut atugarliortut pillugit ilisimasat allat, inunnut sulinerminni sammivigineqartunut aaqqiissutissanik nassaarniartussanut attuumassutillit, katersorneqartarput. Nittartagaq tamatuma peqatigisaanik suliniarnermut tamarmiusumut isaaffiuvoq. Assersuutigalugu suliassaqarfimmi ingerlatsisunut pingaarutilinnut marlunnut, Kalaallit Illuinut aamma Kofoeds Skolemut, linksit nassaarisinnaavatit. Aamma nittartagaq attaveqatigiiffimmut kiisalu suliassaqarfimmi ingerlatsisut akornanni misilittakkanik paarlaasseqatigiittarnermut aallaaviuvoq.

Nittartakkamik atuisunik misissuineq 27. maj – 13. oktober 2008 ingerlanneqartoq maani atuaruk.

Attaveqatigiiffik

Suliniummi attaveqatigiiffimmik pilersitsisoqarsimavoq, misilittakkanik paarlaasseqatigiittarnissamut ineriartortitsinissamullu periarfissiisumik. Siusinnerusukkut attaveqatigiiffik attaveqatigiiffinnik pingasunik, qulequttanik makkuninnga suliaqartunik, imaqarpoq: Atornerluineq, angerlarsimaffeqannginneq inuiaqatigiinnullu akuulersitsineq. Attaveqatigiiffinnut peqataasut kissaateqarnerat tunngavigalugu attaveqatigiiffiit 2007-imiit atorunnaarsinneqarput, siunissamilu qulequttanik nutaanik immikkut sammisaqarluni suliassatigut ataatsimut piginnaanngorsaqqinnissaq sulissutigineqassaaq.

Attaveqatigiiffik pillugu annertunerusumik atuarit

Saqqummersitat ingerlaartitat

Suliniutip aallartisarneqarnerani nuna tamakkerlugu paasisitsiniaanermik ingerlatsisoqarpoq. Paasisitsiniaaneq ilaatigut kalaallit isumaginninnikkut atugarliortut suliniuteqarfigineqarnerat pillugu ullumikkut saqqummersitanik ingerlaartitaqalersimaneranik kinguneqarpoq. Saqqummersitat ingerlaartitat soqutiginnittunit tamanit atorneqarsinnaapput.

Saqqummersitat ingerlaartitat pillugit annertunerusumik atuarit

Suliniutip tunuliaqutaa

Suliniut suliniummut sakkortusisamut, kalaallit Danmarkimi najugaqartut isumaginninnikkut atugarliortut pillugit nalunaarusiaq, 2003-mi isumaginninnermut ministereqarfimmit suliaritinneqartoq, tunngavigalugu aallartinneqartumut, ilaavoq. Nalunaarusiami kalaallit isumaginninnikkut atugarliortut eqqarsaatigalugit suliniarnermi ajornartorsiutit arlalissuit tikkuarneqarput. Ilaatigut ilisimasanik katersinissamik, misilittakkanik paarlaasseqatigiittarnissamik suliniarnerlu eqqarsaatigalugu ataqatigiissaarinissamik pisariaqartitsineq tikkuarneqarpoq.

Socialt Udviklingscenter SUS suliniummi ataqatigiissaarisuuvoq

Socialt Udviklingscenter SUS peqatigiiffiuvoq tamanut iluaqutaasussaq arlaannaannulluunniit attuumassuteqanngitsoq, inunnut isumaginninnikkut mianernartumik inissisimasunut atatillugu suliassanik isumaginnittartoq. Peqatigiiffik 1992-imi pilersinneqarpoq ullumikkullu suliniaqatigiiffinnik 19-inik ilaasortaqarluni. Socialt Udviklingscenter SUS isumaginninnermut tunngasuni suliniarnernik ineriartortitsinermik, ilinniartitsinermik ingerlatitseqqiisarnermillu suliaqarsimasutut ukiorpassuarni misilittagaqarpoq isumaginninnikkullu ajornartorsiutinut atatillugu najukkami naalagaaffiullu iluani suliassanik suliniutinillu annertuunik arlalissuarnik naammassisaqarsimalluni. Ukiuni kingulliunerusuni kalaallinut isumaginninnikkut atugarliortunut suliniarnermut atasumik suliassat arlallit SUS-ip suliassaqarfiinut ilaasimapput.

Ukunani susoqarpa...?