Kalaallit Nunaannit Danmarkimut

Dorthe Kjeldsen

1962-imi Kalaallit Nunaanni Narsami inunngorpoq.
14-inik ukioqarluni angerlarsimaffini qimallugu Paamiunut nuuppoq.
20-nik ukioqarluni panimminut angajullermut anaananngorpoq.
1986-imi panissaaqqippoq.
1998-imi avippoq.

Villy naapippaa, ullumikkullu katissimasutut aapparalugu marlunnillu meeraqarfigalugu: Panimmik qulingiluanik ernermillu arfineq-marlunnik ukiulinnik. Ilaqutariit Vejlemi 1999-imiilli najugaqarfigilikkaminni najugaqarput.

Dorthe Kjeldsen atornerluisunik katsorsaasarfimmi socialmedhjælperitut sulivoq. Minnesota-modellen malillugu imerajuttunik katsorsaasartutut ilinniagaqalernissamut akuerisaasimavoq.

Dorthe Kjeldsen

Danmark maanna nunagilerpara

Pitsaasumik inuuneqarpunga misigisimallungalu ullumikkut Danmark nunagilersimallugu. Uima tapersersorpaanga meeqqavullu marluk maani pitsaasumik inuuneqalernissamut periarfissarissaarput – atuarfeqarnikkut ikinngutitillu peqatigalugit sunngiffimmi sammisassatigut neqerooruteqarfigineqarluarnermikkut.

1998-ip aallartinnerani uinnit siullermit avippunga. Kalaallit Nunaanni Villy naapikkakku Danmarkiliaqatiginiarlugu aalajangerpunga. Taamaalillunga aamma paniga avikkatta ataatani najuinnarumallugu aalajangersimasoq qaninnerulerpara.

Paniga ungasillugu nunanulu nutaaq ilikkarniassallugu ilungersunarsimavoq. Ukiuni siullerni ilisarisimasaqarpallaanngilanga. Qallunaat ammavallaartuunngillat, ilisarisimasaqalernissamullu sivisusarpoq. Meeqqavut mikisut marluk aamma bronkitisimik napparsimapput, taamaattumillu paaqqutariniarlugit suliunnaarpunga. Mattussaaqqasutut kiserliortutullu misigisimalerpunga. Inuuninnut qitiusoq tamarmi tassaavoq ulluinnarni inuunera, allanullu ornigunnissaq nukissaqarfiginngilara.

Dorthe pillugu allaaserisaq tamaat quppersakkami atuaruk.

Dorthemit siunnersuutitsialaat

Danmarkimi suniarnerlutit paasiniaruk: Sunik kissaateqarpit – tamakkualu piviusunngortinniarlugit qanoq iliorniarpit? Danmarkimi inooqatigiinnikkut inuunerup Kalaallit Nunaannit allaanerunera paasilluartariaqarpat. Qallunaatut ilikkarluarnissat isumagiuk – tamanna ilinniagaqarnissamut, suliffeqalernissamut attaveqarlualernissamullu aallaaviuvoq pingaartoq.