Angerlarsimaffeqanngitsuuneq aamma ineqanngitsuuneq

Inunnut angerlarsimaffeqanngitsunut assigiinngitsunik ineqarnissamut neqerooruteqarpoq, herbergini, værestedini aamma natcaféni. Matumani nassuiaaffigineqassaatit neqeroorutit taakku assigiinngitsut suna assigiinngissutigineraat.


Sullissisup inissarsiorninnik ikiorsinnaavaatit

Tassanngaannartumik inissaarukkuit illit sullissisut saaffigisinnaavat. Sullissisup inisimmavissannik pissarsinissamut ikiorsinnaavaatit, tassani illit maannakkorpiaq inissaqanngitsuuninnut nalilersuineq tunngavigalugu (Servicelovens § 80). Amerlanertigut sullissisoq inissiamik innersuussisanngilaq, kisianni soorlu assersuutigalugu utaqqiisaagallartumik pensionatimi akiliilluni ineqartinneqarnissamik innersuussisinnaavoq. Ineqannginnerup saniatigut allanik isumaginninnikkut ajornartorsiuteqaruit sullissisup utaqqiisaagallartumik forsorgshjemimi, herbergimi imaluunniit ineqarfinni nakkutigineqartuni ineqartinneqarnissannut ikiorsinnaavaatit (Serviceloven § 110).

Herbergit, natcafét, ineqarfiit assigiinngitsut

Uani ataani neqeroorutit assigiinngitsut, soorlu herbergit, natcafét aamma ineqarfiit assigiinngitsut pillugit atuarsinnaavutit. Illit illoqarfigisanni neqeroorutigineqartut takusinnaavatit uani Danmarkimi iliuuserisat.

Herbergit

Herbergit utaqqiisaagallartumik najugaqartitsinissamik inuit immikkut isumaginninnikkut ajornartorsiuteqartut namminnerlu inigisaminniissinnaanngitsut ingerlariaqqinnissamillu tapersersorneqarnissamik, isumassuinermik aamma malitsigisaanik katsorsarneqarnissamik neqeroorfigineqarnissamik pisariaqartitsisut neqeroorfigisarpaat. Herbergimi akuerineqarnissaq nammineq saaffiginninnikkut imaluunniit pisortat innersuussinerisigut pisinnaavoq. Akuerineqarnissamut pisortaq aalajangiisuussaaq. Illit najugaqarnerit nammineq akilissavat, tamatumalu qanoq annertutiginissaa herbergimit aalajangerneqassaaq (Servicelovens § 110).

Natcafet

Nunami maani illoqarfinni anginerusuni inunnut isumaginninnikkut ajornartorsiuteqartunut naatsorsuussanik natcaféqarpoq, tassani unnuisinnaavutit, kaffisorsinnaavutit, atisatit errorsinnaavatit, uffarsinnaavutit il.il. Natcafét nalinginnaasumik ammagajuttarput nal. 23:30-p missaanit nal. 7:00-ip tungaanut. Natcaféni aqqit taanngikkaluarlugu unnuisinnaavutit, siullillu takkuttut siniffissat atorneqanngitsut iluatsittarpaat. Natcaféni unnuineq akeqanngilaq, aamma tassani unnuissaguit tassunga innersuunneqaqqaartariaqanngilatit.

Værestedit

Nunami maani illoqarfinni anginerusuni værestedeqarpoq/varmestuit inunnut isumaginninnikkut ajornartorsiuteqartunut naatsorsuussanik. Nalinginnaasumik ulluinnarni ulluunerani akunnerni ammasarput. Værestedeqarpoq immikkut kalaallinut naatsorsuussanik. Værestedit atorneqarnerat akeqanngilaq, aamma tassunngarnissamut innersuunneqaqqaarnissaq pisariaqanngilaq.

Ineqarnissamut neqeroorut

Inunnut timimikkut imaluunniit tarnimikkut piginnaanermikkut malunnaateqartumik pisinnaajunnaarnertik pissutigalugu imaluunniit immikkut ittunik isumaginninnikkut ajornartorsiuteqarneq pissutigalugu pisariaqartitsisunut kommune utaqqiisaagallartumik najugaqarnissaannut neqerooruteqarsinnaavoq. Najugaqarnerit nammineq akilissavat, najugaqartitsiviullu nammineq akissaa aalajangissavaa (Servicelovens § 107). Kommunimit tassunga innersuunneqarsinnaavutit.

Kommuni taakkununnga neqerooruteqarsinnaavoq inunnut timimikkut imaluunniit tarnimikkut piginnaanermikkut malunnaateqartumik pisinnaajunnaarnertik pissutigalugu ulluinnarni iliuuserisartakkanut nalinginnaasunut imaluunniit paaqqutarineqarnissamik, isumassuinermik imaluunniit katsorsartinnissamik annertuumik pisariaqartitsisunut, aamma tamakku pisariaqartitat allatigut nammassineqarsinnaanngikkaangata. Illit najugaqarnerit nammineq akilissavat, akia illup aningaasartuutai aallaavigalugit aalajangerneqartarpoq (Servicelovens § 108).

Qimarnguiit

Qimarnguiit utaqqiisaagallartumik arnanit najugaqarfissatut neqeroorutaapput, arnanut persuttarneqarsimasunut, persuttarneqarnissamik qunusaarneqartunut imaluunniit ilaqutariinnermut aappariinnermulluunniit atatillugu assinganik ajornartorsiuteqartunut. Qimarnguimmukarsinnaavutit nammineq saaffiginninnikkut imaluunniit pisortanit innersuunneqarnikkut. Qimarnguimmut saaffiginnissinnaavutit nalunaarsortinneqaqqaarnak. Taamaaliornikkut atermik isertuussinissamut pisinnaatitaaneq ataqqineqassaaq. Pisortap tassani najugaqarallarnissaq aalajangiiffigissavaa. Najugaqarnerit illit akilissavat, qimarnguiullu akiliutissaq aalajangissavaa (Servicelovens § 109). Qimarnguimmi najugaqarallarninni qitornatit ilagisinnaavatit.

Landsorganisationen af Kvindekrisecentre (LOKK) (qimarnguiit kattuffiata) nittartagaani uani hjemmeside Danmarkimi qimarnguiit allattorsimaffiat takusinnaavat.

Qanoq illit nammineq ineqalersinnaavit

Danmarkimi illoqarfinni anginerusuni inissaqarniarneq ajornartorsiorfiuvoq, tamanna pissutigalugu akisuallaanngitsumik inissarsinissaq ajornakusoorsinnaavoq. Inissiamik pissarsinissamit ajornannginnerusinnaavoq akikinnerullunilu ineeqqamik attartugassarsinissaq.

Illit nammineq inissiamik pissarsiorniaruit imaluunniit ineeqqamik inissiaatileqatigiiffimmut inissiassarsiortutut allatsissinnaavutit, imaluunniit aviisit assigiinngitsut isiginnaartarnerisigut ineeqqamik /inissiamik pissarsiorsinnaavutit. Maluginiassavat illoqarfinni anginerusuni inissiaatileqatigiiffinnit namminersortunit inissiamik pissarsiornerup sivisuumik utaqqiffiusinnaanera, aamma aviisini init imaluunniit inissiat saqqummiunneqartut pilertortumik attartortinneqartarmata.

Kommunip inissamik innersuussisarfiatigut allatsinnikkut inissarsiorsinnaavutittaaq. Utaqqisut allattorsimaffiannut ilanngunnissamut tassanngaannartumik inissaqarniarnikkut ajornartorsiortuusariaqarputit, soorlu assersuutigalugu napparsimaneq, innarluuteqarneq, avinneq, aningaasatigut ajornartorsiorneq imaluunniit assigisaannik peqquteqartumik. Suliat tamarmik maannakkorpiaq atugarisat aallaavigalugu ataasiakkaarlugit ingerlanneqartarput nalilerneqarlutillu. Kommunip inissamik innersuussisarfiatigut allatsikkaluaruilluunniit naatsorsuutigisariaqassavat inissannik ingerlaannartumik tunineqarsinnaannginnerit.