Atuarfik aamma ilinniagaqarneq

Ilinniakkamik aallartitaqarniarpit aamma Danmarkimi ilinniagaqarniartuuneq pillugu paasisaqarusuppit? Imaluunniit Kalaallit Nunaanni ilinniagaqareerpit nalornissutigaajullu tamatuma qanoq Danmarkimi atornissaa? Taava uani ilinniagaqarnissamut kiisalu ilitsersorneqarnissannut periarfissatit uani atuarsinnaavatit.


Kalaallit Illuutaat: Ilitsersuineq aamma kollegiat

Kalaallit Illuutaanni ilinniagaqarnermut siunnersuisartut attaveqarfigisinnaavatit Danmarkimi ilinniarfiit pillugit apeqqutissaqaruit imaluunniit Danmarkimi ilinniagaqarnissamut akuerineqarnissannut ikiorneqarusukkuit. Ilinniagaqarnermut siunnersuisartut Danmarkimi ilinniarnernut tunngasunik apeqquterpassuit akisinnaavaat kiisalu ikiorlutit Kalaallit Nunaanni ilinniakkat sorliit Danmarkimi akuerisaanersut. Ilinniagaqarnissamut siunnersuisartup aammattaaq ilinniartuunerpit nalaaniinnaq ineqarnissannut inissarsiorninnik ikiorsinnaavaatit.

Aarhusimi Odensemilu Kalaallit Illuutaat namminneq kollegiaateqarput ukioq siullermi ilinniartunut naatsorsuussanik ineeraateqarlutik. Aalborgimi Kalaallit Illuutaat inuusuttunut inissaqartitsipput Kalaallillu Illuutaat Københavnimiittoq illoqarfimmi kollegianik atortarluni.

Kalaallit Illuutaanni ilinniagaqarnermut siunnersuisunit paasissutissanik amerlanerusunik pissarsiorsinnaavutit. Kalaallit Nunaanni avataanilu ilinniagaqarnermut tunngasunik paasissutissanik pissarsisinnaavutit uani Namminersorlutik Oqartussat

Kalaallit Danmarkimi ilinniagaqartut kattuffiat

Kalaallit Danmarkimi ilinniagaqartut kattuffiat ateqarpoq Avalak. Kattuffimmi Danmarkimi ilinniagaqartuunerup qanoq ittuunera pillugu kalaallinit ilinniagaqartunit allanit tusagaqartoqarsinnaavoq. Ilinniagaqartut kattuffiat sisamanik immikkoortortaqarfeqarpoq, Aalborgimi, Aarhusimi, Odensemi aamma Københavnimi. Immikkoortortaqarfiit kalaallit ilinniagaqartut akornanni inuttut attaveqaqatigiiffittut atorneqarput.

Avalak pillugu paasissutissat amerlanerusut pissarsiarissavatit uani Avalak

Danmarkimi efterskolit

Efterskoli tassaavoq meeqqat atuarfianni atuarfiusussamik ukiumik kingullermik atuarfiusoq. Tassaasinnaapput 8., 9. imaluunniit 10. klassimik atuarfiusut. Efterskoli tassaavoq nerisaqaatigaluni ineqarfiusoq, tassani najugaqassaatit, nerisaqarlutit aamma atuarlutit. Ilinniagassatigut imarisaa, inuttut ataqatigiinneq aamma inuttut ineriartorneq qitiutinneqarput. Danmarkimi efterskolit assigiinngitsorpassuupput, ilaat timersorneq qitiutittarpaat, ilaasa nipilersorneq imaluunniit allarluinnaq. Efterskolit pillugit annertunerusumik paasisaqarsinnaavutit uani.

Efterskoleforeningen aamma tapiiffigineqarnissamut aaqqissuussinermik peqarpoq. Illit aningaasaateqarpallaanngikkuit tassannga efterskolernissamut aningaasatigut tapiiffigineqarnissamik qinnuteqarnissamut periarfissaqarpoq. Tapiissutit soorlu assersuutigalugu ilinniagaqarnermut siunnersuisumit Kalaallit Illuutaat aqqutigalugit saaffigisinnaasannit ikiorneqarnikkut qinnuteqarfigineqarsinnaapput.

Kalaallit inuusuttut tapiiffigineqarnissaannut piumasaqaatit tassaapput illit inuusuttutut Danmarkimi najugaqartuunissat kiisalu inoqutigiit isertitaasa (najugaqarfinni) naalagaaffimmit tapiiffigineqarnissamut annertunerpaaffissaa assigippassuk.

Tapiiffigineqarnissamut tunngasut annertunerusumik atuakkit uani stipendieordningen aamma Efterskoleforeningip inuusuttunik marluinnik oqaasilinnut sulinera pillugu uani Efterskoleforeningens arbejde med tosprogede unge.

Allu

Allu tassaavoq Peqatigiiffik Kalaallit Meerartaasa Danmarkimi kalaallinut efterskolenut atuartunut neqeroorutaat. 2015-imi augustimi aallartissaaq massakkumullu 2017-imut ingerlasussaalluni. Inuusuttut kajumissutsiminnik suleqataasut weekendini kalaallinut efterskoleni atuartunut sammisaqartitsisassapput.  Inuusuttut inunnut allanut attaveqalernerunissaat anguniarlugu, kalaallit oqaasiisa atornissaannut periarfissinneqassapput tamaattumik aamma inuusuttut efterskolemi ulluinnarni ulapiffiusumi ”anersaartorfissaannik” allumik periarfissinniarlugit. ALLU (GRL).